Бизга Амр ибн Али хабар берди, у деди: бизга Яҳё, Исмоилдан, у Омирдан, у Абдуллаҳ ибн Амр (розияллаҳу анҳумо)дан (ривоят қилди), у деди: мен Расулуллаҳ (соллаллаҳу алайҳи васаллам)нинг: «Мусулмон — тилидан ва қўлидан мусулмонлар саломат бўлган кишидир. Муҳожир эса — Аллаҳ тақиқлаган нарсаларни тарк этган кишидир,» деяётганларини эшитдим.
Бизга Ҳафс ибн Умар хабар берди, у деди: бизга Абдурраҳмон ибн Маҳдий, Мансур ибн Саъддан, у Маймун ибн Сиёҳдан, у Анас (розияллаҳу анҳу)дан (ривоят қилди), у деди: Расулуллаҳ (соллаллаҳу алайҳи васаллам): «Ким бизнинг намозимиздек намоз ўқиса, қибламизга юзланса ва сўйган (ҳайвонимиз)имиздан еса, ана ўша мусулмондир,» дедилар.