Бизга Ҳусайн ибн Язид ат-Таҳҳон ал-Куфий ривоят қилди, у деди: бизга Муҳаммад ибн Фузайл, Зирор ибн Муррадан, у Муҳориб ибн Дисордан, у ибн Бурайдадан, у отасидан (ривоят қилиб) деди: Расулуллаҳ (соллаллаҳу алайҳи васаллам): «Жаннат аҳли бир юз йигирма сафдир; улардан саксонтаси шу умматдан, қирқтаси эса қолган умматлардандир,» дедилар. Абу Исо (Термизий) деди: бу ҳадис ҳасандир. Бу ҳадис Алқама ибн Марсаддан, у Сулаймон ибн Бурайдадан, у Набий (соллаллаҳу алайҳи васаллам)дан мурсал равишда ҳам ривоят қилинган; уларнинг баъзилари эса: Сулаймон ибн Бурайдадан, у отасидан, деб айтган. Абу Синоннинг Муҳориб ибн Дисордан (қилган) ҳадиси ҳасандир. Абу Синоннинг исми Зирор ибн Муррадир; Абу Синон аш-Шайбонийнинг исми Саид ибн Синон бўлиб, у басраликдир; Абу Синон аш-Шомийнинг исми эса Исо ибн Синон бўлиб, у ал-Қасмалийдир.
Бизга Маҳмуд ибн Ғайлон ривоят қилди, у деди: бизга Абу Довуд ривоят қилди, у деди: бизга Шуъба, Абу Ишоқдан хабар берди, у деди: мен Амр ибн Маймуннинг Абдуллаҳ ибн Масъуддан ривоят қилаётганини эшитдим, у деди: биз Набий (соллаллаҳу алайҳи васаллам) билан бир чодирда тахминан қирқ киши эдик. Бас, Расулуллаҳ (соллаллаҳу алайҳи васаллам) бизга: «Жаннат аҳлининг чораги бўлишингизга розимисизлар?» дедилар. Улар: «Ҳа,» дедилар. У: «Жаннат аҳлининг учдан бири бўлишингизга розимисизлар?» дедилар. Улар: «Ҳа,» дедилар. У: «Жаннат аҳлининг ярми бўлишингизга розимисизлар? Жаннатга мусулмон жондан бошқа ҳеч ким кирмайди. Сизлар ширк (аҳли) орасида қора ҳўкиз терисидаги оқ тукдай ёки қизил ҳўкиз терисидаги қора тукдай (озсизлар),» дедилар. Абу Исо (Термизий) деди: бу ҳадис ҳасан саҳиҳдир. Бу бобда Имрон ибн Ҳусайн ва Абу Саид ал-Худрийдан (ҳам ривоятлар) бор.